Carta abierta a José María Díaz

Queridu José María  que allá, en tierra aragonesa, daste maña, ente los maños, escribiendo pal AUSEVA,  quiera Dios t´al cuentres sanu  tantu tú cual tó costiella, cuando a tós manos allegue aquesta esgonciada lletra. Per equí tá al respective,  la muyer y la reciella,  mandándovos,tós,memories,  y yo un abrazu da tercia.

                 Sabrás, mió queridu amigu, que asina allega EL AUSEVA a esta tó casa y la mía, cueyo el papelín con inercia y non alcuentru descansu hasta atopar con tó cencia. Y cá día más entrugau non columbra,  non acierta,  non ye capaz  d´enterase esta mió pelada cresta como diaños t´arreglasti  pá deprender con pacencia tantu nome revesosu,  el padre que lu fixera, los fíos que de tal salieren y hasta si tien o non güela.

Cuando yéramos pequeños xuntos juimos a la escuela y pel mesmu silabariu y pe la mesma llibreta deprendimos a lleer casi a juercia de vareta. Dempués, allá n´ Estitutu golvimos a ser parexas,  y ellí solu se falaba  de la Asociación aquela d´estudiantes folgazanes o tamién de la rigüelta  de los mineros d´Asturies. Más tarde vieno la guerra… dempués vieno el estraperlu… dempués la rapaza aquela que a min me traxo tarumba hasta llevala a la iglesia… ¿Quiés decimi, amigu míu, onde atopasti tó cencia?

Si tiés dos vaques ratines siempre xuncíes en parexa, bebiendo en mesmu regatu, paciendo la mesma yerba, durmiendo na mesma cuadra, ha de ser xustu, por juercia, dén les dos la llechi igual, o non hay quien esto entienda. Asina tú y yo pacimos los dos una mesma lletra  y tú das llechi sabrosa, una llechi d´Academia, mientres yo tó siempre escosu  y solu el bable m´allegra. Tú fales a lo cazurru tou enllenu de sapiencia. Yo, como cortau a jachu, falo cual fala la aldea. Tú tás volando muy altu, como el águila na peña. Yo quisiera ser malvís que en probe gorrión se queda. Tú pienses bien cuantu fales pós quiés dar llustre a la Llengua. Yo falo mal, cuantu pienso, con mio llengua parllotera. Tu xurgues de les palabres  una sílaba, una lletra  y hasta del puntu la i aciertes la parentela. Yo xurgo en torpes palabres y só duru de mollera pós sólu sé que la i o ye llatina  ó ye griega.

Tú cueyes un silabariu entames la primer jueya y, en menos d´un santiamén  enxaretas una riestra de nomes muy apaecidos  y de la mesma fachenda.   Yo cueyo les mesmes lletres  puestes por ti nel AUSEVA,  xuro que son toes mellices  y, al paecer, nin s´asemeyan. Golviendo al exemplu aquél que anantes punxi por preba, yo só una vaca casina  que pace por la cuneta y tu yes de pura raza o soiza ú holandesa. Porque yes tan entendíu  n´esta cuestión de la llengua, vó consultate un asuntu que mi fraya la mollera. N´eso de la ortografía ando cual de pelambrera, famientu d´entrambes coses, sin saber denguna regla, anque, a dicti verdá, pá trabayar la jacienda por munchu que ortografíes non das a la tierra güelta, y pá la contrebución si pones a la peseta un puntu, pués furacala, y prestu en rialín se queda.

Por eso yo tó contentu  con enquivocar la regla. Quier dicise que la B, cuando quiero que se vea, fágola asina de grande  pero fágola pequeña si quiero desimular lo escritu ante quien lo llea. Asina yo punxe VACA y non BACA ¡qué rediela! pos la vacuca que tengo a la B grande non llega. Pero agora vieno el Fiscu  mete una b que berra … ¡ 30 pesetes del alma!  por cada vaca de aldea. Y yo,agora, tó na duda de si deprendi na escuela que vaca non ye con B, por ver si asina s´arregla  el asuntu del impuestu y más p´abaxu lu dexan. O yo tó mal del caletre o mió memoria s´alcuerda de oyer falar al Maestru  cuando mos dicía, na Escuela, que la B yera de BURRU y non de VACA ¡poñeta!

Solu tú pués arreglalo.  Ponmi el conteu de tó cencia. Xurga el llibru dicionariu  estruxa cuantu ellí hebia, regüelvi puntos y comes y al que inventó la tal lletra…. Y escribi dempués,llixeru nel periódicu EL AUSEVA: daqué asina o apaecíu:

“Un ñuevu impuestu a la aldea repuñó del silabariu, en sin razón, una lletra. Dexó solu la B grande y matómos la pequeña”.

P´adelante, José María, aspero por tó respuesta mientras quedo sospirando ante tal comenencia: ¡Probines vaques casines que pacés por la cuneta!

¿Non vién PACIÓN, de PACIENTE?  Pós a PACER… de PACIENCIA.

                                                                                      XUACO FANA

“AUSEVA”

8 Marzo 1.959

.